Durante o mes de xullo as brigadas de mantemento dos lousados do centro histórico estarán a traballar na rúa Travesa de Fonseca, reparando e substituíndo as lousas de granito que así o precisen. Non está previsto que se produzan cortes de tráfico. "A pedra que pisas" é o programa de conservación e mantemento dos pavimentos históricos da zona vella de Santiago de Compostela. Financiado polo Consorcio de Santiago, o programa establece un calendario de actuacións e coordina aos equipos de traballo que serán os encargados de reparar e manter os pavimentos de granito das rúas do centro histórico, en concreto as situadas no interior da améndoa, o que supón máis de 63.000 m2 de lousados. O servizo desenvolve un programa de reparacións elaborado de acordo coa Oficina de Rehabilitación do Centro histórico. Ademais, o  Consorcio de Santiago habilitou un buzón de correo electrónico no que os cidadáns poderán informar os incidentes que detecten no pavimento, de maneira que os equipos de traballo inclúan a reparación na súa actividade común. A dirección é apedraquepisas@consorciodesantiago.org.