O Consorcio de Santiago adxudicou a CYS HISPANIA, S.L. as obras de intervención para o mantemento da cuberta e fachada do Pazo de Bendaña, un inmoble de elevado valor patrimonial integrado na Cidade Histórica de Santiago de Compostela e que actualmente acolle a sede e o espazo expositivo da Fundación Eugenio Granell. O contrato foi adxudicado por un investimento total a 164.788,96 euros, IVA incluido, e un prazo de execución de tres meses.

A intervención permitirá actuar sobre diferentes elementos da envolvente do edificio para mellorar o seu estado de conservación e corrixir os danos derivados do paso do tempo e da exposición ás condicións ambientais. Entre os traballos previstos inclúese a eliminación de entradas puntuais de auga na cuberta e a renovación do gran lucernario de vidro do patio, así como a limpeza e aplicación de hidrofugante nas fachadas, a pintura das carpinterías e a limpeza e rexuntado das sillerías deterioradas.

O conxunto das actuacións está orientado a deter o deterioro dos materiais, minimizar os efectos das condicións ambientais adversas e controlar a colonización biolóxica das fachadas, contribuíndo á durabilidade do inmoble e á preservación dos seus valores históricos e arquitectónicos, así como do uso e dos contidos que alberga.